السبب الحقيقي لطلاق «أنجلينا»

بشكل مفاجئ، تناقلت وكالات الأنباء قرار النجمة العالمية أنجلينا جولي رفع دعوى قضائية للطلاق من زوجها الشهير براد بيت، مشترطة حق الحصول على حضانة أطفالها الستة - نصفهم بالتبني - معتبرة أن الحياة الزوجية التي تجمعها بـ«براد» اعتبرت منتهية منذ 15 سبتمبر 2016، إثر خلافات لا يمكن تسويتها ولا حلها حسب تصريح جولي.

المهم قفز الخبر على «جروبات الواتساب» بسرعة مدهشة أسرع من خبر تحذير لبس الجوارب أثناء النوم حتى وصل إلى «جروب أحلى جارات» التي تشترك فيه شقيقة براد بيت، وفور ارسال أم «فرانك» الخبر نسخ ولصق بعد خبر الفوائد السحرية لليمون في علاج السرطان حتى جنّ جنون شقيقة الفنان براد بيت «كريستينا»، لبست ثوبها على وجه السرعة ولفّت الشال على رأسها ثم أوقفت تاكسي بمنتصف الشارع مثل المجنونة وانطلقت الى بيت شقيقها.. قرعت الجرس، فتحت لها أنجلينا جولي الباب بعينين منتفختين وبيدها محرمه تمسح أنفها الراشح.. «تفضلي»..

كريستينا - خير شو فيه.. صحيح اللي سمعته..

أنجلينا هزّت رأسها بالإيجاب وانفجرت بالبكاء..

كريستينا - والله والله يوم بشوفكم بتطلعوا وبتفوتوا مع بعض مبسوطين بالأعراس ماسكين بأدين بعض بالمهرجانات وأنا بقول عين صابتكم وما صلّت ع النبي..

أنجلينا - لا يا ختي مش عين.. أخوك تغيّر..

كريستينا - والله أخوي ما في منه حنون وطيب وعلى نيّاته..

أنجلينا وهي تعصر أنفها بمحرمة - على نيّاته ها؟؟؟ اسكتي اسكتي..

كريستينا - احكي لي شو فيه..

أنجلينا جولي - السهر كل يوم لوجه الصبح بالقهاوي بيجي ريحته تفاحتين وسلوم قلنا معلش.. الأولاد والبيت راميهم علي لا بيسأل ولا يهتم.. الثلاثة الزغار «رشح» وحرارة طول الليل ما نمت ولا سأل.. ويوم يقعد عندنا، ولا بيفتح ثمه بكلمة معنا، بيقضي وقته ع التلفون ع الواتساب مع مين بيحكي ما بعرف..

كريستينا - والله يا خيتي كلهم هيك..

أنجلينا - اسكتي انت الثانية لا تدافعي عن أخيك..

كريستينا - أنا بحكي لك الواقع..

أنجلينا - آه.. أمّا لما تشوفي ع تلفونه وأنت تنبشي فيه صورة وحدة أوكرانية لابسة «شورت»، وبتبيع فجل وكاتب تحتها «هاي النسوان» بتحسّي باللي بقلبي!!

كريستينا - بس؟؟

أنجلينا - ولقيت كمشة صور لنسوان كلها بتخزي..

كريستينا - بهاي معك حق أنا رح احكي معه ولا يهمك.. بس بتطلبي الطلاق عشان قصص بتصير بكل دار؟؟

أنجلينا - بتصير بكل دار بس مش بدار «براد بيت».. كمان أنا صار لي 4 سنين ماخذة قرض ع راتبي نفسي استلمه كامل مرة زي هالنسوان نفسي اشتري فستان جديد، ثوب، أوخذ لأمي «كيلو لحمة أو بكسة جوافة» أشتري لأبوي «بطاقة تلفون» أو دواء ضغط..

كريستينا - آآآآخ.. والحل؟

أنجلينا - ما في حل.. يسدد القرض عني ويحرّر راتبي.. ويطلقني.. الــ 300 دولار نفقة للأولاد بدبّر حالي فيهم.. خليني أعرف أربّيهم صح.. وخلي «الأوكرانيات» ينفعنّه!

كريستينا - لا حول ولا قوة إلا بالله.. في عندك غير هالحكي..

أنجلينا جولي - لا.. يخلّص قرضي ويطلقني.. والنفقة عند القاضي!

**

تعليق «براد بيت».. هاي مش سوالفها.. هاي سوالف أمها..

ahmedalzoubi@hotmail.com

لقراءة مقالات سابقة للكاتب يرجى النقر على اسمه .